Се бара ново идејно архитектонско решение за градскиот плоштад PDF Печати Е-пошта
Напишано од Unevski on Четврток, 08 Февруари 2018 08:48   

Општина Кавадарци објави Конкурс за избор на идејно партерно и архитектонско решение за пренамена на дел од градскиот плоштад. Новото општинско раководство сака да ја промени намената на амфитеатарот и на големата фонтана, да го дополни плоштадот со зеленило и со урбана опрема, но и да го подобри осветлувањето. „Амфитеатарот стана слепа точка на плоштадот бидејќи не се користи и не ја остварува функцијата за која е наменет. Големата фонтана која е поврзана со амфитеатарот се покажа како непрактично решение во поглед на тековно одржување и нејзина заштита од вандализам“ се наведува во распишаниот конкурс.


Градскиот плоштад во Кавадарци со претстојното идејно решение е предвидено да има нови зелени површини, дополнителна урбана опрема, места за велосипеди и други елементи. Понудениот труд треба да биде функционален и одржлив на подолг рок, но и да се вклопи во постојниот амбиент на останатиот дел од плоштадот. Пренамената на дел од постојната површина треба да се изведе со материјали сродни на сегашните материјали вградени на градскиот плоштад. Заинтересираните архитекти треба да ги достават изработените идејни решенија најдоцна до 30 март. Најсоодветниот архитектонски труд ќе биде награден со прва награда во висина од 45.000 денари.


Градскиот плоштад во Кавадарци беше реконструиран пред помалку од осум години. Тогаш се инвестираа околу 450.000 евра во поплочување на плоштадот со гранитни плочки, изведба на амфитеатар за културни манифестации и фонтана посветена на богот Дионис.

 




 
Get Adobe Flash player
Сите права се задржани - Copyright © www.kavadar4e.com - Designed by Mitrov