Барселона и Реал Мадрид ги оправдаа очекувањата на фудбалските фанови и одиграа уште едно возбудливо „Ел Класико“ кое му припадна на домашниот тим.

Каталонците се реваншираа за поразот од првиот дел на првенството, победувајќи вечерва со 2:1 и зголемувајќи ја својата предност на четири бода пред најголемиот ривал за титулата.

Натпреварот започна со големата шанса на Роналдо кој ја погоди пречката, за во 19-та минута, по асистенција на Меси од слободен удар, Матје со глава го совлада Икер Касилјас за 1:0 за Барса. Следуваше притисок на гостите кои заслужено стигнаа до израмнување по фантастичната акција Модриќ-Бензема-Роналдо која Португалецот ја претвори во 1:1.

До крајот на полувремето Бејл и Роналдо пропуштија добри шанси за целосен пресврт, а првата шанса во вториот дел ја имаше Бензема чиј удар одлично го одбрани Браво.

Барса го направи решавачкиот потег во 56-та минута кога Алвеш испрати одлична долга топка кон Суарез, а овој по одличниот прием, успеа да го совлада Касилјас.